Младите актери од Струмица синоќа со претставата „Стјуардеси“ успешно настапија на 15-от Меѓународен театарски фестивал за деца и млади ДОПС што се одржува во градот Јагодина, Србија.
Во конкуренција од 54 театарски претстави од различни земји, струмичката група беше дел од десетте селектирани претстави кои годинава влегоа во официјалната програма на фестивалот. Со својата изведба младите актери ја претставија Струмица и Македонија во најдобро светло, освојувајќи ја публиката со својата енергија, сценска изразност и актерска посветеност.
На крајот од изведбата, громогласниот аплауз од присутните и позитивните коментари од стручното жири беа потврда за нивната извонредна интерпретација и за квалитетот на претставата.
Претставата „Стјуардеси“ е динамична комедија која преку духовит текст и современ сценски израз обработува теми блиски на младата публика, а истовремено испраќа порака за вредноста на трудот, одговорноста и човечноста.
Со овој настап, младите струмички актери уште еднаш потврдија дека Струмица е град со богата театарска традиција и талентирани млади уметници кои успешно го претставуваат градот и земјата на меѓународната сцена.
Улогите во претствата ги играат: Кирил Стојчевски, Александра Митева, Лилјана Ковачева, Саве Ичкова, Ивана Чонева, Мирче Ташев и Елена Николова. Режисер на претствата „Стјуардеси“ е познатата актерка на струмичкиот театар, Танкица Стојанова.
Фестивалот ДОПС, кој традиционално се одржува во Јагодина, претставува една од најзначајните регионални манифестации посветени на младинскиот и детскиот театар, каде што секоја година учествуваат групи од Србија, Македонија, Црна Гора, Босна и Херцеговина и други земји од регионот.
