Денеска во Струмица пред голем број граѓани, пред се млади луѓе, бизнисмени, здруженија на граѓани, јавни установи, пратеници се одржа информативен ден за запознавање на јавноста со мерките од Оперативниот план за вработување. Говореа заменик-министерот за економија и труд, Марјан Ристески, директорката на Агенцијата за поддршка на претприемништво, Даниела Димовска, заменик-директорката на Агенцијата за вработување, Весна Пешова, како и Маја Јовановска, раководител на одделение во Министерството за економија.
Во своите излагања, претставниците на институциите ја потенцираа важноста на активните мерки за вработување, поддршката за самовработување, обуките и субвенциите за работодавачите. Тие истакнаа дека Владата останува посветена на намалување на невработеноста преку соработка со стопанството, невладиниот сектор и локалната самоуправа.
„Со историски висок буџет за Оперативниот план, кој е зголемен за 7,5 милиони евра и годинава е во вредност од преку 40 милиони евра, како никогаш досега Владата дава поддршка за младите да започнат бизнис или преку практикантство и обуки да се стекнат со разни вештини со што би се зголемила нивната вработливост и тие би биле поконкурентни на пазарот на труд. Наша цел е да ги задржиме младите во Македонија, имаат пријател и партнер во Владата која ги поддржува, а најдобар доказ за тоа е овој Оперативен план, каде покрај бројните нови мерки наменети само за нив, во сите останати мерки е предвидено најмалку 40% од средствата да бидат наменети за младите лица“ – кажа заменик-министерот за економија и труд, Марјан Ристески.
Според Весна Пешова, заменик-директорот на Агенцијата за вработување, интересот за мерката самовработување (претприемништво) е голем и само во првите два дена од објавата на огласите се поднесени околу 1400 пријави. Кажа дека јавните повици траат до 20 јуни, а во наредниот период ќе се објават јавни повици и за другите мерки од оперативниот план.
Промоцијата во Струмица е дел од поширока кампања за запознавање на јавноста со можностите што ги нуди оперативниот план, кој годинава опфаќа повеќе нови мерки и значително зголемен буџет за нивна реализација.
