Општинскиот комитет на ВМРО-ДПМНЕ во Струмица синоќа на плоштадот „Гоце Делчев“ со концерт одбележа 35 години од своето основање.
На концертот настапија познати музички изведувачи, Некст Тајм, 2Bona, Пајак, Куку Леле, Мина Блажев, Александар Тарабунов, Огнен Здравковски, Ламбе Алабаковски, кои повеќе од два часа ја правија атмосферата роденденска и полна со патриотски дух. Публиката можеше бесплатно да се освежува со пијалоци за време на концертот. Фалеше само роденденска торта, како во изминатите години.
Елена Достинова во име на Општинскиот комитет им се обрати на присутните, говорејќи за 35-те години ВМРО-ДПМНЕ во Струмица, за почетоците од 8 јули 1990 година, потенцирајќи дека денес Општинскиот комитет во Струмица е повеќе од политичка структира, кажа дека тој е срце што чука со народот, со иднината и со идеалите на нашите предци.
„Вечерва Струмица тивко прославува голема победа на единството и заедништвото. Вечерва Струмица прогласува победа на храброста, љубовта и народната мудрост. Тајната е во намерата. Да ја направиме Струмица достојна и горда“ – кажа Достинова.
Пред стартот на концертот преку видео бим се обрати и лидерот на ВМРО-ДПМНЕ и премиер, Христијан Мицкоски, честитајќи им го големиот јубилеј на своите сопартијци од Струмица.
Концертот беше организиран како дел од активностите за јубилејот, на кој покрај многуте граѓани од различни возрасти, членови и симпатизери на партијата, сегашни и поранешни функционери на партијата, градоначалниците на општините Василево и Ново Село, првиот претседател на ОК од 90-тите, како и гости од централното раководство на ВМРО-ДПМНЕ, предводени од потпретседателот на партијата, Александар Николовски, беше и синот на премиерот Христијан Мицкоски, 18-годишниот Јован.
Настанот беше дел од пошироката стратегија на партијата за зајакнување на локалните структури и поттикнување на единството меѓу членовите пред претстојните Локални избори.
