„Златна петорка“ освои Гран при за најдобар игран филм во Америка

10 Октомври 2017

На есенското издание на 36-от Интернационален филмски фестивал во Њу Џерси, македонскиот долгометражен игран филм за петте струмички студенти „Златна петорка“, во режија на Горан Тренчовски, освои Гран при за најдобар игран филм.

Претходно филмот го вреднуваше 15-члена комисија составена од академици, професионалци и новинари, кои од вкупно 377 наслови од целиот свет го вброија меѓу 17 финалисти.

Вчера пак, по завршувањето на натпреварувачката програма, организаторите официјално ја соопштија конечната одлука за наградените. 

Ова е воедно и 7-ма меѓународна награда за екипата на „Златна петорка“, која не успеа да го помине филтерот од Македонија за номинација за Оскар, како филм од неанглиско говорно подрачје.

Филмската дистрибуција на „Златна петорка“ продолжува и понатаму, како на странските фестивали така и во киномрежата низ Македонија.